「請注意頁底重要聲明」
大家最想知的，就係漁夫認為乜嘢投資項目先至係亂世下的投資避難所？
漁夫先講一件有趣的事。據傳喺第二次世界大戰以至波斯灣戰爭，美軍飛行員都有一種生存裝備，以備一旦戰機被擊落而跳傘降落敵區後求生。根據美國軍事博物館的資料，呢個求生套裝裏面，除咗武器、通訊裝備、急救藥物之外，仲有五枚金幣及三枚金戒指，務求喺危急關頭換取當地人的幫助，又或賄賂敵方士兵，讓機師謀一條生路。
資料來源：survivlareadyblog.com
漁夫早於2018年9月，已經呼籲大家要揸黃金，最好佔資產比例約10%，而當時金價大約1200美元。作呢個部署的原因，目的唔係想買金大賺，其實反而係唔想金價升，理由係金價只會在局勢動盪或通脹肆虐之時才會大漲，所以買金嘅目的，實際係為資產組合買保險！依家全球政經局勢立立亂，大家應該見到呢個買保險的效果，而且未來恐怕會更加顯著（亦係漁夫最唔希望見到的環境）。高盛近期就發表研究報告，若未來美國通脹率高於2%目標，金價將突破每盎司2000美元；而金價紀錄高位係2011年9月的1921美元。漁夫認為，金價突破紀錄高位的成數唔細。
前面講過，貨幣係一種價值的儲存載體。但係當央行濫發貨幣，腦筋轉得最快的投資者就會另覓一種載體去儲存價值，呢種載體，可以係樓、債券、股票，甚至係數碼貨幣（例如Paul Tudor Jones便提倡Bitcoin）。最重要係，呢種載體的供應必須有限，而唔係好似貨幣咁無限供應，其價值才唔會流失並得以保存。另一方面，喺最極端情況下，例如爆發戰爭，呢種載體仍然要有其價值，而不動產以至債券及股票都各有缺點。
於是乎，在和平時期未見耀眼的黃金，喺目前亂世就成為其中一種備受追捧的儲存價值載體。另一方面，作為貴金屬的黃金，自古以來供應有限，亦令其價值不易消失。有評論認為，自1848年美國加州黃金大發現後，世界上90%的黃金資源都已被開採。到目前為止，人類歷史以來總共開採的黃金大約為19萬噸，大概只需要三個半奧運標準游泳池就足以擺放，可見幾咁稀缺！
漁夫先講講黃金與貨幣關係的歷史。黃金係過去2500年來儲存價值的重要工具，喺19世紀的英國，採用一個名為「金本位制」（gold standard）的貨幣制度，每單位的價值等同若干重量的黃金，而唔同國家貨幣之間的滙率，就以佢哋的金平價（gold parity，即含金量之比）來決定。因此，各國的滙率係固定的，按各自兌換黃金的比率計算得出。咁亦意味央行唔能夠隨意增加貨幣供應，必須有能力以黃金兌換已發行的全部本國貨幣。
喺二戰之後的1944年，世界上大部份國家訂立咗一個「布列頓森林協定」（Bretton Woods Agreements），用意就係建立一個以美元為國際貨幣中心的貨幣體系。當時美國作為儲備貨幣發行國，基本責任之一就係保證美元按照官價兌換黃金，亦即各國的貨幣均可透過聯儲局換回黃金，因此停止競相貶值，全球維持了一段時間的貨幣穩定期，令戰後經濟得以復甦。
點解央行後來又可以猛印銀紙？1971年美國經濟衰退，美元陷入危機，喺1973年，時任總統尼克遜宣布美元同黃金「脫鈎」。從此以後接近50年時間，央行便可以無限制地印鈔票，而各國貨幣相對黃金的購買力，就蒸發咗92%至99%不等！
一直以來，坊間都有「Death of the Dollar」 （美元已死）的說法，意指美元不斷濫印，遲早一文不值。漁夫的睇法係，美國一日有強橫的軍事勢力支持，美元霸權都一日唔會改變，但藉着貶值以通脹作為隱形稅項蠶食全球購買力、作其「稅」月神偷，則應該係大勢所趨。更何況依家唔止美國印錢，連各國央行都一齊印……我哋此等弱小漁民，要點樣配置資產，先可以保護自己的財富？
等漁夫醒一條計算金價的公式俾大家：
當人民對本國貨幣的信心接近零，則金價相對就接近無限大！
資料來源：World Gold Council
不過，漁夫亦唔會建議投資者瞓身All-in黃金，尤其喺呢個通脹與通縮並存的時代，作為理性投資者，資產組合的平衡才是最重要！
全天候組合Plan ABCDE
如果有訂閱漁夫系統，大家都應該知道Plan ABCDE全天候組合，在此講解少少。喺呢種忽冷忽熱嘅投資環境，突顯咗兩手準備的重要性，當中Plan A仍是對應通縮的方案，而Plan C則是抗通脹惡化的措施，投資者必須不時根據市場氣候來調校比重。若然我哋見到有跡象由通縮進入滯脹甚至惡性通脹，我哋的Plan A就必須撤退。
聯儲局在喺2020年3、4月為市場注入海量流動性，而且睇嚟仍會繼續印錢救市。這種史無前例嘅無限印錢買資產的行為，遲早都會引致惡性通脹，同為貴金屬的白銀亦值得留意。因此，漁夫一直唔敢減低Plan C比重，甚至再次把白銀ETF加番入去。如果大家有留意，白銀期貨已升穿4月高位，表現出奇地強。事實上，美國做QE1時，白銀係其中一種升得最勁嘅工具。至於今次白銀是否再次跑出，漁夫當然沒有肯定答案。不過，漁夫認為，資產配置中放入三幾個百分點白銀作為inflation hedge，是不錯的選擇。另一個做法，就係買入遠期白銀ETF超價外認購期權，當買惡性通脹保險，這跟之前漁夫為大家推介以VIX做tail hedge的方法一樣，只需要資產值少於1%買明年超價外白銀Call便可以。
至於股市，首先要認清大轉移之後的趨勢之一，就係非必需品如奢侈品、旅遊、能源等出現通縮，必需品如食品、醫藥、清潔用品等出現通脹，無論是香港還是美國，都出現兩極化表現。
事實上，港美兩地股市均有接近八成弱勢股，被大量蟹貨壓住，最明顯例子便是銀行、能源及旅遊相關股。另一方面，又有兩成股份表現強勢甚至不斷創新高，表表者係宅經濟、醫藥及金礦股。所以股市整體表現是在反映緊通縮，但有小部份風中勁草可以揸中線或短炒。
講番轉頭，Paul Tudor Jones喺佢既市場展望報告裏面，亦有提及幾種對抗Great Monetary Inflation的工具，黃金係呢場「通脹競賽」（Inflation race）的首名贏家。除此之外，納斯達克指數ETF、通脹掛鈎債券（TIPS）、高盛商品指數（Goldman Sachs Commodity Index, GSCI），以及摩根大通新與市場貨幣指數（JPM Emerging Market Currency Index），以及一些Long Short策略，都可以考慮。佢仲特別提到，Bitcoin也是一種值得投資的儲存價值載體！當然，鹹魚青菜各有所愛，正如漁夫成日教大家，各位投資者宜按照自己本身的策略去作部署。
資料來源：Market Outlook Macro Perspective, Paul Jones & Lorenzo Giorgianni
重要聲明：股市漁夫內的所有內容，包括本影片，絕不構成任何投資意見或購買任何股票及金融產品的特定推薦意見及/或不構成任何游說或要約，以購買、出售或以其他方式交易任何證券、期貨、期權或其他金融工具或其他產品，漁夫系統的內容亦並非就任何個別投資者的特定投資目標、財務狀況及個別需要而編製。投資者不應只按漁夫系統的內容進行投資。用戶必須留意，漁夫系統的所有訊號，並非是買賣訊號或任何投資建議，而所有訊號均是全自動用第三方提供之客觀市場數據計算出來的結果，當中並不涉及任何人為的想法、修改、修訂或任何投資建議。本網站包含的所有內容、資訊、訊號，並不針對任何特定的投資目標、財務狀況以及可能使用或接收該內容的特定人員的特定需求。在作出任何投資決定前，投資者應考慮各種金融產品的個別特點、個人的投資目標、可承受的風險程度及其他因素，並適當地尋求獨立的財務及專業意見。
